Rev 15 | KWJ | STEP | Ete wosiwanumbwa ani ai heiwani hewen ko ki wupa ba fotito sirawani, ani inaka tenge walefo naha ya ani hambwanda. Ani heiro sumbu mwe ti ka hinga: Tapa'angi hatachi fisi ensel wui tapa leki hima leni walambe wu wosino tapa'angi hatachi fisi kapwa mwa'ambwe le ya wu torosinda. Woro kale kapwa mwa'ambwe ini humbuwa sumbu fo ichai ai sukwa hinga. Hinde wowani, kale tapa'angi hatachi fisi kapwa mwa'ambwe ki Gotri sembe enge a ti humbukonda.

Revelation of John 15

Tapa'angi hatachi fisi ensel tapa'angi hatachi fisi kapwa mwa'ambwe leni torosinda

1 Ete wosiwanumbwa ani ai heiwani hewen ko ki wupa ba fotito sirawani, ani inaka tenge walefo naha ya ani hambwanda. Ani heiro sumbu mwe ti ka hinga: Tapa'angi hatachi fisi ensel wui tapa leki hima leni walambe wu wosino tapa'angi hatachi fisi kapwa mwa'ambwe le ya wu torosinda. Woro kale kapwa mwa'ambwe ini humbuwa sumbu fo ichai ai sukwa hinga. Hinde wowani, kale tapa'angi hatachi fisi kapwa mwa'ambwe ki Gotri sembe enge a ti humbukonda.

2 Ete wosiwani ani ai heiwani mwa'ambwe fo soluwara hinga ya da. Mwa'ambwe mwe ti ukuchapu ga hi tinga funda dawani heindau hinga. Woro o mwa'ambwe gamba ki hima fwele ya wu eninda. Ele hima hinga to ka fuku pe kapwa asa ni gumwa sisini mwale rihi hinga setaro me tako ga hi rihi tini sawero namba tinga, fini ni wu dikiro. Gotri to gita tini wunu ri hasiwani wu torosini ya wu eninda. 3 Wondani wunu Gotri tau ra himache ri Moses hukwa tinga ri Sipisip Che ri hukwa tinga ya wu randa. Wu raro hukwa mwe ti ka hinga:

“Apukolaka, mini ele kwambu ga dau Gotri.
Ele tau hinga mi randau ti, omwesika naha, o keke o tini nu heindani inaka kipe walefo naha nu hambwandau!
Mini dele nuwe mapwa ki dau himiyama hurahama lei King Apukolaka hinga mi dau.
Ele mi numbo hinga tinda ete kipe naha, mwe naha tumbwa.
4 Apukolaka, mindombwa naha halaya naha ki mi dau.
O keke namo naha to mini ni aki nambwe apa ri dano? Namoto apa hi mihi tini rasai hinga? Mina.
Dele hima tiya laka hinga apa wu tani mini numbwa ele lotu wu wokonda.
Hinde wowani, sumbu kipe mihi ti amwei naha sukwaro.”
5 O sumbu hinga sirawani ani ai heiwani hewen ko ki dau nika'ari ba kiro aka we ki kwai Gotri aka tipa kipe naha oti ya tukwa. Nika'ari ba kiro lotu wo aka o ki Gotri mwanji rihi ti mwe naha kumbwa bwandau. 6 Wosiwani kale tapa'angi hatachi fisi kapwa mwa'ambwe torosindau ensel leto o Gotri aka tipa kipe naha wu andosini hoko tokwe ya wu sira. Nika'ari wuhi ti kisi nambwe, nimba hifweri naha tini wu injisini gol ba wosiro leti tini inaka wuhi tiki ya wu tatipisinda. 7 Wosiwani kale himamwale ga dau mwa'ambwe opuri'opuri forito tapa'angi hatachi fisi ensel ele ni tapa'angi hatachi fisi gol ba wosiro bapi le ya wunu ri ha. Dele bapi mwe le, handa nambwe ete da ete da Gotri ri sembe enge a ti ele ki talesindau. 8 Wosiwani hiki to Gotri hi hinga okundau sumbu ki, e, ri kwambu ki sukwani ka Gotri aka tipa kipe naha ki kwai ya tale. Woro ka aka tipa kipe naha rihi ki hima fori apa hinde ri raru kumbwa. Minambwe naha. Kale tapa'angi hatachi fisi ensel le rataro kale tapa'angi hatachi fisi kapwa mwa'ambwe le humbusiwambwa.